TURI TURIAN TAMBATUA

TURIAN NI RAJA TAMBA TUA. Bagian 1
Oleh Pak Deborah Sidabutar pada 26 November 2014 pukul 13:47
Penulis : Op. Tordado Tamba
Disalin oleh : Borju Tamba


OPPU RAJA SIAMBATON manang OPPU RAJA BOLON ditano pangururan mangoli boru ni rajai boru ni MALAU RAJA ... leleng diparlelengan,tarlalap do oppu i dang mar gelleng.dungi humasusu manang lulu-lulu ma rohani oppu i,jala mangoli ma ibana muse tu na padua halihon....
jadi dung saut tu oppu boru na parpudi i ( imbangna ),juppa ma songon nasinitta ni rohana,dapot parsaulianna songoni nang TUA na..pittor dapot ma sada anak,jala digoari ma i SIBOLON TUA jala dapot tong nang sada boru,digoari mai PINTA HAOMASAN ...
alai anggo oppu boru nanialap na napar jolo i ( boru ni malau raja ),sai marsak do rohana ala soadong tubuna...jala ala ni parsorion nai,martangiang ma oppu borui tu DEBATA MULA JADI NABOLON...

tinggil ma DEBATA di tangiang pangidoan ni oppu boru i,jala disuru ma manuk -manuk patiaraja pasahathon na punangido na i """ pangan ma tamba tua purba jolma dohot indot """
dapot di arina,jala gok nang dibulanna,gok muse naang ditaonna,toppak jala tubuma anak buha bajuna,dibahen ma goarna TAMBA TUA,hombar tu boa-boa ni manuk patiaraja,jala marudut ma muse anakna,ima anggi nisi TAMBA TUA,,ima SARAGI TUA,MUNTE TUA,NAHAMPUN TUA...

""" asa tubu ma oma-oma dibona ni parsihupian,tubu las niroha,gabe juppang parsalisihan """ ,disada tikki,ala naung magodang anakna na lima i,dibahen hian do panggoarina anak tubu ni oppu boru na parpudi i,ima SIBOLON TUA ,,marsise ma oppu ta si TAMBA TUA tu among na oppu RAJA NABOLON/SIAMBATON ...
""" hombar tu adat uhum na pinungka ni napar jolo,ala ahu do tubu ni tuanlaem,ingkon ahu do siboan goar....! """ alai dapot ma hape songon na nidok ni umpama :
"" nunga manuan bulu ho amang,dihandang ni babi
mambahen naso uhum,mangulahon naso jadi ""
ai ahu do tubuh ni tuanlaem,na nialap ni sanggul,da ingkon ahu ma nian siboan goar.... !
beha do bahenon hu ! ai SIBOLON TUA do par jolo huharoani,ai tarpahusor ahu ma urat ni hau dompak ginjang....? alus ni OPPU RAJA NABOLON /SIAMBATON

Ndang tikkos na nidok mi among,ai dainang do jumolo di alap ho...!
jadi humasusu manang marsak mapamikkiron ni amang na i,dang tarnok be simalolong na laho modom,jala gabe tubu ma dirohana mambahen anak na i marsiujian marhite bodil.Alai dibagasan roha na tong do marhasurungan tu anank na na jumolo tubu i,ima SIBOLON TUA..
di isi ma disi habunian anak ni bodil ni anak na na lima i,antajau mardongan taruge do anak n i bodil ni SIBOLON TUA,alai gadong na mongkol do anak bodil ni SITAMBA TUA dohot anggina..
diboan ma nasida tu adaran,dibahen ma janji si ingoton tu anak na na lima i,manang ise na mabugang,sae tawar gambiri ma mangubati,alai manang na ise naso mabugang,ima gabe panggoaringhu.

disuru ma parjolo si TAMBA TUA mamodil,alai dang tuk,songoni SARAGI TUA dohot MUNTE TUA,tong dang tuk..
ipe da hahang TAMBA TUA,nunga mammodil hita na tolu,amparanta ma jolo ma modil,saut ma tutu,mamodil ma SIMBOLON TUA,hona ma pat ni NAHAMPUN TUA..

Tarida ma dikkan ni among nasida,ima OPPU RAJA BOLON,ai nunga tardapot antajau mardongan taruge do anak bodil ni SIBOLON TUA,jadi makkuling ma si TAMBA TUA,nunga tardapot ho among,parroha nalian di pangalahomon,ipe anggia NAHAMPUN TUA,rung-rungi ma jolo bodil mi anggia,,
tarida ma tutu gadong na mongkol do anak bodil ni nasida na opat.Dung songoni namasa i,marsak situtu ma roha nisi PINTA HAOMASAN,iboto nasida i,marnida pangalaho ni among na nalian i.Tubu ma tu rohana,ianggo SIBOLON TUA,dang tarbahen so jumpangan nisi TAMBA TUA,alani pangalaho ni amang na i..

ro ma tu pikkiran ni iboto nasida na malo marroha i,,songon dia ma bahenon hu asa unang jumpang parsalisihan di angka ibotonghu na lima on..borhat ma iboto nasida si PINTA HAOMASAN i manopot jabu ni oppu boru na parjolo i,,jadi ro ma sukkun-sukkun nisi TAMBA TUA tu ibotona i,,
""" ido ito...! roho dibagasan borngin,dang adong dongan mu.apal aha namasa ito...? """
dagee,,dagee,,ito nabasa : ianggo amanta i,parroha nalian doi,ai nunga hubege mardikkan ibana na margelleng i,jala nunga tubu hatana hubege,roha naso mallabu,pangalaho naso ture.ai didok,ikkon gadison na ma hamuna tu tano simalungun,ima alana umbahen naro ahu ito mandapothon hamuna..
tung mate pe amang ta i,naso jadi berengon muna,alai anggo hamuna do ito nabasa,siraja ibot,manang tudia pe hamuna laho,ikkon do jumpangan natama bahen ni DEBATA MULA JADI NABOLON..
dungi borhat ma ito nai,dialap ma sada lomok-lomok,laho manulangi itona na opat i dohot oppu boru i.ima songon padan dinasida namariboto i,laos mar sipanganon ma nasida..Dipasahat si TAMBA TUA ma hata nauli mardongan pasu-pasu tu ibotona namalo i jala marsijalangan ma nasida huhut sai tumatangis,marningot hina lungun ni pambahenan ni among nasida i.
Jadi didok si TAMBA TUA ma hatana,,ikkon borhat ma nasida manadikkon OPPU RAJA BOLON,jala dang jadi be idaonna timus ni apina.borhat ma nasida,jala dipataru ibotona ma nasida sahat tu hutanamora..
'''' ipe ito,olat nion ma hami pataru,mulak ma ibotokku,urani soadong dongan muna mardalan laho mulak.Alai lungunma roha nisi PINTA HAOMASAN,ibotona namalo marroha i,dinalaho marsirang nasida,gabe sai tumatangis do ibana,huhut dipasada rohana mandok "" ianggo ahu,dang mulak be,manang tudia hamuna mangulon,rap dohot inongta,anggo ahu,ikkon dohot nama ahu "" dielek-elek ibotona naopat ido dohot oppu borui,asa mulak ibana,alai dang olo,ai nunga sada rohana ikkon dohot rap hon nasida...

dang tarjua nasida be pangidoan ni iboto nasida i,jadi laos dohot ma ibana.Dungi mardalan ma nasida manuju pintu batu tu huta ni tulangna.
Dipatorang ma tu tulangna,pangalaho ni among nasida i,dinamardikkan dinamar gelleng i,alani ido ditinggalhon nasida huta sumba/huta pangururan,huta ni amang na i.
Tulang nasida ipe antong,gabe marsak ma rohana mamilang-milangi pangalaho ni lae nai,dijakkon ma nasida di pintu batu,dilehon ma tano ulaonna jala dilehon muse tano bahen parhutaanna,tinggal ma nasida di pintu batu jala mamukka huta disi...
Ndang sadia leleng,dung marhuta nasida di pintu batu,tongon ma disada tikki,marpariama do di tano sumba/pangururan,huta ni among nasida i ,dung sidung mambuat eme,manutung durame do angka halak dibalian di tano pangururan huta ni amang na i.
Jadi tarida ma timus ni api di pangururan huta ni amang na i,ala natarida dope timus ni api sian pangururan,martup-tup ma nasida ingkon pinda muse.Borhat ma nasida muse tubariba,ima tu SIHOTANG sinuaeng.Dipungka ma huta na disi,ima namargoar huta SAMPURAMBALA.Tinggal ma nasida disi,ai mangkirim do rohana ndang berengonna be sian i timus ni api ni pangururan.
Alai tong do songon namasa na di pintu batu na dihutana hian,Dinajumpang pariama muse di pangururan,manutung durame do disi isi ni luat pangururan i,jadi tarida do muse timus ni api ni pangururan sian sihotang.
Martup-tup ma muse nasida ingkon pinda sian sihotang.Borhat ma nasida sian sihotang mamolus GONTING,DOLOK SIMARGULANG OMBUN.dung sahat di gonting,makkatai ma nasida namar HAHA-ANGGI,jala SATAHI MA NASIDA LAHO MARSIRANG DISI...

Disuru ma SARAGI TUA borhat tu tano SIMALUNGUN,jala mangambat bosi.
Munte tua tu tano KARO ,huhut mangambat hapas,,
Nahampun tua tu tano BARUS huhut mangambat sira...
Tinggalma si TAMBA TUA dohot OPPU boru nang iboto nai..
Jadi tuat ma si TAMBA TUA tu tano TAMBA sinuaeng,jumpasa ma disi sada mata mual natio dompakhon julu jaeanna,Solo ma rohana mamereng mual i,jala dibahen ma goar ni mual i,BAGAN TAMBA...

Dinamardalan i ibana mangaririt tano i,pajumpang ma ibana dohot babiat.Martonggo ma ibana tu MULA JADI NABOLON,mangido pangurupion,asa di urupi ibana,unang di hahua babiat i...
Pintor toppu adong suara....
-- Songon bou si domdom ulu.....!
ise do ho....?
-- Ahu doi ompung.....
mutu do siborok manjalahi guluan..
loja roha manjalahi hangoluan ...
-- Boasa ro ho tuson,ai inganan hu do on...!

Alai marpollung tubu ma si TAMBA TUA mangalusi soara i,didok ma :
-- Ai huboto do hamuna Raja nasangap,jala na timbo do inganan on.Alai di
dolok natimbo do inganan ni Raja ,asa unang haboluson dohot hatindian....
Ai tutu do na nidok mu....?
-- Tutu do ompung....!
-- Molo songoni,ise do goarmu...?
-- TAMBA TUA do ompung...
-- Goar hu pe paboan hu ma tuho...!
OMPU BAGANDING TUA,,Tua maima-ima,Tua mamasu-masu.Molo ho tinggal dison,oloi ma hatang hu,ingkon tona honon mu tu pinompar mu,asa di ingot pasangaphon ahu...
-- Ahama sitonahonon hu tu pinomparhu ompung....?

-- Molo naeng pasangap ahu,buat ma horbo si tingko tanduk,si opat pisoran,naung mangarage di tongani pargalungan.Horas ma jolma,gabe na niulana,sinur nang pinahan.Margondanghon lomok,ima babi limbat boru-boru napitu samarina,na ualu sada lobu,parjolo-jolo ruar,ruar sian lobu,,pasahathon pelean manuk lahi bini...
-- Dungi dioloi si TAMBA TUA ma pandohan i,Borhat ma ibana tu luat na timbo,ima dolok ulu darat.Dipungka si TAMBA TUA ma hutana,dibahen ma goarna ... : HUTA JULU,, ala dompak julu jaean ni mual na.Ojak ma ibana disi,jala sonang nang rohana mangingani tano i.
Disada tingki,masa do ujui logo ni ari dohot haleon potir di tano pangururan,lelengna pitu taon,pitu bulan,pitu ari...
Di taon parjolo haleon i,adong do sada ina dohot boruna laho mangalului rias tu binanga bolon di TAMBA sinuaeng.Dung sahat nasida disi,di bereng ma nunga adong namanjoloani nasida,ai nunga habis dibuat naparjolo i,rias na adong disi.Ala porlu ni rias,ai ido naboi padaon male,jadi laho do nasida dompak dolok paihut-ihut binanga i,anggiat nian dapotan rias nasida.Sahat ma nasida dompak dolok,ipe asa dihilala roha nasida naung bot ari.Jala nunga songgop si margulang ombun.Bobonosan ma inanta i jala mardongan biar,tudia nam hami laho,ai nunga habornginan..Manaili ma boru na i dompak julu,di ida ma disi adong timus ni api,laho ma nasida mandapothon timus ni api i..

Tarsonggot do si TAMBA TUA dung di ida adong ro borua dua halak,disukkun ma nasida...
-- ale inang ! sian dia do hamuna,jala laho tudia..? umbahen nasahat hamuna di bot ni ari tuson...?
Dipatorang inanta i ma,pardalananna umbahen sahat nasida tu huta nisi TAMBA TUA..
Umbege hatorangan ni inanta i,gabe dijakkon ma nasida tu jabu huhut ma disungkun manang na boru aha nasida jala marga aha namangalap.Dina hundul di lage-lage tiar andorang so mangan,didok si TAMBA TUA ma hatana tu inanta i...
-- Ooh ale inang,inang namora boru...!
Adong do nion silompaon,alai dang adong na mangalompa,adong do nion sidudaon,alai dang adong namanduda..
Umbege hata nisi TAMBA TUA i,marhusori ma diroha ni inanta i mangalapati hata i,ninna ma mangalusi ...
-- Ale amang,,adong do dison borukku na padot mula-ulaon,jala naringgas manduda,jala malo mangalompa..Molo tung une diroha muna, borukki ma nagabe pangalompa muna..

Alai ianggo inang nisi TAMBA TUA,laho do ibana masilulu tu tataring mandapothon boruna si PINTA HAOMASAN,huhut padaohon boruna,ai nunga maraburan ilu-ilu sian simalolongna,ai songgot do rohana.
Edana do hape naro i,jala boru ni ibotona do hape namarbajui,ima boru ni MALAU PASE RAJA.hehe ma ompu borui,didapothon ma nasida,dihaolma edana i dohot maenna i,huhut ma didok....:
-- Sombakku ma di hamuna eda,ia ahu edam do jala berem do anak hon. Na pina toho ni DEBATA MULAJADI NABOLON do haroro muna on.jala tung halas honon hu ma hatami eda,ingkon saut ma borumi gabe parumaenhu,jala parsonduk bolon nisi TAMBA TUA...

Dimanogotna dinalaho mulak inantai,didok si TAMBA TUA do hatana...
-- inang,,Molo dung sahat hamuna tu huta ni Datulang,sotung pola jolo baritahon hamuna tu haha-anggi ni tulang namasa on.Alai,maruari do ahu tu DEBATA MULAJADI NABOLON,molo dung jumpang ditingkina,ingkon ro do hami marsomba tu hamuna hula-hula nami songon pasahat sulang-sulang na gok...
Dipaborhat ma inanta i,jala diboan do nang eme huhut didok :
-- Ia eme on inang,bahen hamu ma on gabe boni,ai ginoaran do on EME nisi TAMBA TUA,anggiat ma gabe nang di hauma muna.