SEJARAH HUTA TURNIP

SEJARAH HUTA TURNIP
Oleh Sialapit Turnip di ARSIP TAROMBO TURNIP (Berkas) • Sunting Dokumen
“Rea Raja” manang Op. Toga Datu Turnip, onma goarni oppungta Turnip naparjolo. Ima anakkonni opungta Tambatua na sian huta Tamba. Mamukka huta ma Op. Toga Datu Turnip on tu huta Simanindo. Di goarima huta I “Huta HATOGUAN”. Molo letakna saonari pasma di “Tugu Turnip” na di simanindo i. jadi ima alasanna disi di pajongjong Tugu Turnip , Alana di si huta ni oppungta na parjolo, molo asalna sian huta tamba.
Dang sadia leleng dung marhuta di huta Hatoguan on, marpinompar ma opungta on, sorangma (lahir) anakna ima namargoar “Op. Raja Manase”. Jala holan “Op. Raja Manase” on do molo anakon ni Op. Toga Datu Turnip.
Dung magodang Op. Raja Manase on marhasohotanma, di alap ma boruni tulangna. Dang pala sadia leleng dung marhasohotan, sorangma anakonni Op. Raja Manase ima namargoar Op. Raja Oloan (Turnip Raja) dang pala sadia leleng tubuma muse angina ima namargoar Op. Raja Banua (Turnip Tua). Jala holan dua do ianakkon ni Op. Raja Manase.
Dung magodang Op. Raja Oloan dohot Op. Raja Banua marhasohotanma di alapma boruni tulang na, Jala rap marhuta di huta hatoguan. Dung piga leleng marhotripe Op. Raja Oloan dohot Op. Raja Banua, dung hira hira piga taun, matutungma (terbakar) ma huta Hatoguan i.
Dung matutung huta i, di pukka ma muse huta nabaru , sekalian pajaehon Op. Raja Oloan dohot Op. Raja Banua. Hutani Op. Raja Oloan di pukka ma di ginjang ni Tugu Turnip ima, di baen ma goarna “Lumban Toguan”. Hutani Op. Raja Banua di toruni Tugu I, di baen ma goarna “Lumban Turnip”. Langsung do di bagihon songon tano panjaean (parbagianan). (Lihat map). Mulai sian Tugu Turnip ma tudolok molo parbagianan ni Op. Raja Oloan. Molo parbagianan ni Op. Raja Banua mulai sian batas tugu ima sahat tu toruan (batas pantai danau toba).
Jadi dung di bagima tano panjaean on, dung hira hira piga taon gabe adong ma istilah “Turnip Dolok dohot Turnip Toruan”. Hira hira songon ima pardalanni istilah on. Molo pasma di ula perbatasan tano panjaean on. Molo parlumban toguan mangula perbatasan on, ninna ma “olatnion ma ula, unang be di ula nadi toru i, bagian ni Turnip na di toruan nama I”. Jala songon I do tong sebalikna molo parlumban turnip mangula parbatasan tong ma di dok sogon on “unang be di ula tu ginang, bagian ni turnip na di dolok kan nama”. Jadi holan istilah do molo turnip dolok dohot turnip toruan. Dang pembagian ni turnip. Alana turnip “SADA” do mulai sian najolo sahat tu saonari. Jala holan di simanindo do molo istilah on . Jadi antar songon i ma pardalanna.
Dung hira hira piga leleng “marpinompar ma Op. Raja Oloan di Lumban Toguan, sorang ma ima namargoar OP. Datu Guru Mangata Manuk, jala holan ibana do bawa tubuni Op. Raja Oloan.
Suang songon I nang Op. Raja Banua dung hira hira piga leleng marpinompar ma di huta Lumban Turnip sorang ma Op. Marhilap, siakkangan, Op. Mualnihuta sipaidua, Op. Sotardugur sipaitolu, Op. mamatik sipaiopat, dohot siappudan Op. Pagoraja.
Dung magodang Op. Datu Guru Mangata Manuk, marhasohotan ma, di alap ma boru ni tulangna. Dang pala sadia leleng sorang ma anakna Op. Bala Borngin siakkangan, Op. Sahatraja sipaidua, Op. Guru Sobaloson sipaitolu, dohot siampudan Op. Agung. Dung piga leleng dung sorang siampudan i, matutung ma huta Lumban Hatoguan. Mamukka huta nabaru ma Op. Datu Manganta manuk di baen ma goarna Lumban Uruk. Laos di lumban uruk ma di pagodang Op. Datu Mangata Manuk anak na na opat i. dung magodang, marhasohotan be ma dialap ma boru ni tulang na. dang pala sadia leleng dung mahasohotan anak na na opat I, matutung ma huta Lumban Uruk. Dung matutung lumban uruk, laoma Op. Sahatraja mamukka jita tu Siulok (sian huta sinuan tu dolok, saotik jonokkon Raut Bosi). Di boan ma angina na dua. ALai molo Op. Bola Borngin tong do marhuta di Lumban Uruk, di paulima jabuna nabaru. Dung piga leleng dung marhasohotan Op Bola borngin, sorang ma ankana ima Op. Mangasa Raja siakkangan, Op. Hatoguan sipaidua, Op. Saribuaji sipaitolu, Op. Sopuluan sipaiopat, Op. Dingotlan sipailima, dohot sadanai sipapudan. Dung magodang anakna na onom on, marhasohotan be ma, dialap ma boru ni tulangna. Dung marhasohotan be matutung ma muse huta Lumban Uruk.
Dung matutung lumban uruk on, ninna oppugn i ma tu anakna na onom on, dang sarasi hita marhuta di Lumban Uruk on, tatinggalhon ma huta on. Mulak ma muse Op. Mangasa raja tu Lumban Toguan, Op. Hatoguan lao ma tu Raut Bosi mamukka huta ma ima huta Lumban Turnip, Op. Saribuaji mamukka huta ma tu Sidaji. Op. Sopuluan mamukka hutama tu Sigurgur, Op. Dingotla laoma mamukka huta tu Sipinggan. Molo siampudan abangna Op Sopuluan ma di ihuthon tu Sigurgur. Jadi pinompar ni Op. Siapudan on a nalao mangaratto tu Salbe, Liang Deak , dohot Liang Atas. Pasma pahoppuni op siampudan on namargoar Op. Barang Boha. Jadi mulai sian ankni Op. Mangasa Raja ima Op. Tuan Binur sahat tu pahopuna, sahat rodi saonari marhuta di Lumban Toguan.
Suang songon i do pinomparni Op. Raja Banua tong do marserak mamukka huta be nasida. Op. Marhilap ma manginganni Lumban Turnip sebagai siakkangan. Laoma mamukka huta Op. Mualnihuta mamukka huta tu huta Ginjang/Peajolo, Op. Sotardugur mamukka huta tu Lumban Bolak(Raut Bosi). Op. Mamatik laoma mamuka huta tu Littong molo siampudan di Lumban Turnip do tong mandonganni Op. Marhilap.
Songon peninggalan bersejaran ni oppungta naboi berengn di simanindo saonari ima:
1. Tabbak di Lumban Uruk (berbentu sehira kuburan)
2. Horban : jonokni Lumban Toguan
Horban : sada haujior nabalga, di sonma oppungta najolo marguru hadatuon, dohot martamiang tu mulajadi nabolon (sebelum adong agama)
1. Batu persegi Opat di pahat di bahan tutupna denggan, ima ingannani saring saring ni Op. Bola Borgingn (di huta Lumban Toguan)
2. Patung Ulubalang : di huta Lumban Toguan
Ulubalang : prajurit/pengawal namanjaga harbangan di huta (Pr. Bolak)
1. Parbiusan : sada inganan na luas (berbentuk lapangan) las di sonma oppugn ta najolo marulaon bius dohot marpesta
2. Mata Aek/ Mata Mual Si tukko Nabolon, di dolok jonokni Huta Ginjang, tu son ma hita turnip molo di dik goarna mangalap aek
Ket: Situkko : Raja Si Tolu Tali (Turnip, Sidauruk, Sitio)
On ma nabou tambahan antar songon sejarah Marga Turnip dohot hutani Turnip di Simanindo. Olo adong na hurang lobi mengenai penulisan, manang penulisan goar penulis mangido masukan, kritik, saran, naberhubungan tu sejaran ni Hita dohot pomparan turnip.
Ucapan terima kasih
• Natua tua ni huta, lumban toguan, lumban turnip
• Op. Erikson (pa. Moben) di simanindo
• Pa Monika (tegal)
• Arjon Turnip ( Penggagas Punguan Pomparan Turnip utk Facebook)
• Peri Turnip ( Penggagas Punguna Pomparan Turnip)
• Dohot akka na asing, mangurupi terbitna sejarah huta turnip dohot pomparanna on.
Botima. Mauliate, horas.
Ide cerita : Eli .M.Martinus Turnip (A. Nicolas Turnip) (nicolasturnip@yahoo.com)
Editing : Peri Turnip(turnip_fbi@yahoo.com / www.turnipfbi.wordpress.com)



Sejarah 1